Tatak-Pinoy
ni RONALD YABUT
Source:  Kabayan On Line


SAAN mang larangan ay nakikilala ang Pinoy.

Sa kulay ng kanyang balat, taas, hugis ng mukha, tangos ng ilong,
paglalakad, pananalita o anumang aspeto ay madaling malaman kung ang
isang tao ay Pinoy.

Maraming bansa ang humahanga sa Pilipino dahil sa taglay na
kabutihang-loob at malasakit sa trabaho. Nagugustuhan ng mga dayuhan ang
Pilipino dahil sa kanilang talino at sa mabilis na pang-unawa sa gagawin.
Likas kasi sa ating mga Pinoy ang mga mabubuting kaugalian na hindi
makikita sa ibang lahi.

"Kabayan" ang tawag natin sa ating mga kalugar o kababayan. Sa pagiging
magkababayan, naipapakita natin ang ating samahan o suporta sa bawat isa.
Nandiyan din ang damayan at pagtutulungan.

Subok na ngang matatag ang pagkatao ng bawat Pilipino. Narito ang ilang
katangiang tunay nating maipagmamalaki sa lahat.

Malikhain

Likas sa ating mga Pinoy ang pagiging malikhain -- sa sining,
gawaing-bahay, trabaho, pagsasaya at teknolohiya. Hindi tayo nagpapahuli,
ika nga. Sa katunayan, napabantog ang ating national artist na si Ka Levi
Celerio, buong mundo dahil sa pagtugtog niya sa pamamagitan ng dahon.
Aba'y tatak-Pinoy talaga 'yun!

Makapamilya

Pamilya muna bago ang iba. Mas prayoridad nating mga Pilipino ang ating
kapamilya o ang ating mga mahal sa buhay. Hangga't maaari ay ayaw nating
magkahiwa-hiwalay. Close ang bawat isa -- mula sa lolo hanggang sa
magiging apo. Sa hirap at ginhawa, magkakamag-anak.

Maka-Diyos


Nasa Diyos ang awa, nasa tao ang gawa. "Bahala na ang Diyos" ang
karaniwan nating naririnig sa ating mga kababayan. Malalim ang ating
pananampalataya at pananalig na hindi tayo pababayaan ng Panginoon.
Malapit tayo sa mga sakramento at simbahan. Di nga ba't ito ang dahilan
kung bakit mahilig din tayong magdiwang ng mga kapistahan.
Nagpapasalamat tayo sa mga grasyang tinatanggap!

Tumatanaw ng utang na loob

Ang pagtanaw ng utang na loob ay likas sa atin. Hindi natin ito mawaglit sa
ating puso at isipan. Palagi tayong nagpapasalamat sa mga taong tumulong
sa atin sa oras ng ating pangangailangan. Handa naman tayong ipagkaloob
ang tulong na ating makakayanan kung ang pinagkakautangan ng loob ay
siya naman ang nangangailangan.

Makabayan

Sa pagsunod sa batas, masasabi nating tayo ay tunay na makabayan. Hindi
lang sa digmaan, sa krisis o sa anumang sakuna nasusukat ang malasakit
natin sa bayan. Nasasalamin natin ito sa paglilingkod ng tapat at sa
pagtatrabaho ng maayos. Ang bawat araw ay pinahahalagahan at ang bawat
problema ay sinosolusyunan.

Matiyaga

Kapag may tiyaga, may nilaga. Aba'y ilang beses na itong inulit-ulit sa atin
ng mga matatanda. Kailangan daw nating magpakasakit upang makamit ang
pangako ng magandang bukas. Ganito rin daw sa pag-ibig. Kailangang hindi
tayo manghinawa sa pagpapadama ng ating pagmamahal. Sa pamumuhay
naman, marami na rin sa ating tanyag na kababayan ang naging
matagumpay dahil sa kanilang pagsusumikap at pagtityaga.

Bayanihan

Sama-samang pagtulong sa mga nangangailangan na walang hinihintay na
kabayaran o kapalit. Dito tayo sikat! Hangad nating makita na masaya ang
ang ating mga tinutulungan. Bukal sa ating kalooban ang pagbibigay ng
tulong at paggawa ng kabutihan. Sa paggawa o paglipat ng bahay,
pagtatanim o pag-aani, paglilinis at kahit na sa pagluluto kapag may
handaan, nangingibabaw ang bayanihan sa karamihan.

Pakikisama

Wala na sigurong hihigit pa sa ating mga Pinoy pagdating sa pagkakaibigan.
Sa trabaho, paaralan o saan mang dako, siguradong tayo ay may mga
kakilala at kaibigan. Hindi nga ba't mahilig tayong gumimik at magdamayan
sa hirap at ginhawa, may pera o wala. Ang sarap talaga maging Pinoy!